Қазақстан мен Словакия экономикалық ынтымақтастықты нығайтуда: Астанада бизнес-форум өтті

Бүгін Астанаға қазақстан-словак бизнес-форумына қатысу үшін 37 словак кәсіпкер құрайтын делегация келді. Іс-шараға ҚР Сыртқы істер вице-министрі Роман Василенко, Словакия Республикасының экономика вице-министрі Владимир Шимоняк және Қазақстан сыртқы сауда палатасының басқарма төрағасы Мұрат Қарымсақов қатысты. Кәсіпкерлер арасында энергетика, атом өнеркәсібі, денсаулық сақтау, көлік, жаңа технологиялар, тамақ өнеркәсібі және т.б. салалардың өкілдері болды.

Бизнес-форум қатысушыларының алдында сөйлеген сөзінде Қазақстанның сыртқы сауда палатасының басқарма төрағасы Мұрат Қарымсақов Қазақстан мен Словакия арасындағы экономикалық байланыстарды нығайту мен бизнес үшін жаңа мүмкіндіктер жасаудың маңыздылығын атап өтті.

"Бұл іс-шара Қазақстан мен Словакия арасындағы экономикалық байланыстарды нығайтуға және бизнес үшін жаңа мүмкіндіктер жасауға деген ортақ ұмтылысымызды көрсетеді. Сыртқы сауда әлдеқашан Қазақстан дамуындағы басты қозғаушы күш болды және біз халықаралық сауданың құрылымы қаншалықты тез өзгеретінін көріп отырмыз. Бұл өзгерістер тауарлар мен қызметтерді жаңа нарықтарға бейімдеуді ғана емес, сонымен қатар оларды белсенді түрде ілгерілетуді талап етеді", – деді М. Қарымсақов.

Естеріңізге сала кетейік, жақында Қазақстан өз тарихындағы ең жоғары кредиттік рейтингке ие болды, бұл біздің экономикамыздың тұрақтылығы мен тартымдылығын көрсетеді. Сарапшылардың айтуынша, бұл қазақстандық компаниялар үшін халықаралық аренада жаңа мүмкіндіктер ашады және шетелдік инвесторлар тарапынан сенімді нығайтады.

"Қазақстанның транзиттік-көліктік мүмкіндіктері бізді халықаралық инфрақұрылымдық жобаларда маңызды серіктес етеді, сондықтан біз шетелдік компанияларға осы жобаларға қатысуымызды ұсынуға дайынбыз. Біздің палата шағын және орта бизнесті, әсіресе форс-мажорлық жағдайларға байланысты мәселелерді белсенді қолдайды және шығындарды азайтуға жәрдемдеседі", – деді Қарымсақов.

Кездесу барысында Қазақстанның Словакия үшін сауда саласында ғана емес, геосаяси тұрғыда да басты әріптес ретіндегі маңыздылығы бірнеше рет атап өтілді.

"Қазақстан Словакия үшін сыртқы сауда тұрғысынан ғана емес, кеңірек геосаяси контексте де маңызды серіктес болып табылады. Еліңіздің серпінді экономикалық өсуі, жалғасып жатқан экономикалық реформалар, технологиялық инновациялар және бай табиғи ресурстар словакиялық компанияларға дәстүрлі салаларда ғана емес, жаңа дамушы секторларда да ынтымақтастыққа кең мүмкіндіктер ашады. Біз бірлескен жобаларда, әсіресе инфрақұрылым, логистика және өнеркәсіп саласында зор әлеуетті көріп отырмыз", – деп атап өтті Словак Республикасының вице-министрі Владимир Шимоняк.

Ата кететін жайт, Словакия Еуропаның орталығындағы стратегиялық ахуалының арқасында мықты өнеркәсіптік базаны дамытып, өзінің озық технологиялары мен табысты тәжірибесін Қазақстан нарығына енгізуге дайын.

Форумды қорытындылай келе, қатысушылар өзара ынтымақтастықты дамытуға қызығушылық танытып, Қазақстан мен Словакия арасындағы әріптестік қатынастарды одан әрі нығайтуға сенім білдірді.